როგორ ამყარებს აწმყო დროის გამოყენების სტრატეგია დამაჯერებლობას მომხმარებლებში.

მეტი დამაჯერებლობისთვის გამოიყენეთ აწმყო დრო პროდუქტების ციფრულ მიმოხილვებში 

შესავალი

დღეს ციფრული ხანა საფუძველს უყრის მომხმარებელთა ქცევის ახალ ტენდენციებს, სადაც ონლაინ პროდუქტის მიმოხილვები უდიდეს როლს თამაშობს მყიდველთა გადაწყვეტილებებში. კვლევების მიხედვით, მომხმარებლისთვის მიმოხილვებში გამოყენებული დრო (ტემპუსი) მნიშვნელოვან გავლენას ახდენს მიმოხილვის დამაჯერებლობასა და დახმარების დონეზე. ამ სასწავლო მასალაში განხილულია, თუ რატომ არის აწმყო დროის (Present Tense) გამოყენება მიმოხილვებში უფრო ეფექტური და როგორ შეიძლება ამ ცოდნის გამოყენება მომხმარებელთან კომუნიკაციისა და მარკეტინგის სტრატეგიების გასაუმჯობესებლად.

კვლევის ძირითადი მიგნებები

სტენფორდის უნივერსიტეტის დოქტორანტ ფანგისა და მისი კოლეგების მიერ ჩატარებული კვლევა მოიცავდა 16 მილიონზე მეტი მიმოხილვის ანალიზს Amazon-ის პლატფორმაზე. კვლევის შედეგებმა აჩვენა, რომ აწმყო დროში დაწერილი მიმოხილვები 5.5%-ით მეტად არიან „დალაიქებული“, ვიდრე ის მიმოხილვები, რომლებშიც სხვა დროა გამოყენებული. ეს მიგნება მიუთითებს, რომ მომხმარებელი აწმყო დროში დაწერილ მიმოხილვებს უფრო აქტუალურად, რელევანტურად და სანდოდ აღიქვამს.

ფსიქოლოგიური ასპექტები

მიმოხილვებში აწმყო დროის გამოყენება მომხმარებლებში გამოცდილების უფრო რეალურ და „ცოცხალ“ აღქმას განაპირობებს. ფსიქოლოგიური თვალსაზრისით, აწმყო დრო მომხმარებელს უქმნის შეგრძნებას, რომ ეს ინფორმაცია ახლაა აქტუალური და მნიშვნელოვანი. მაგალითად, ფრაზა: „კარავი წყალს არ ატარებს წვიმის დროს“ უფრო დამაჯერებლად ჟღერს, ვიდრე „კარავი არ ატარებდა წყალს წვიმის დროს“ ან „კარავი არ გაატარებს წყალს წვიმის დროს“.

მარკეტინგული გამოყენება

იმის გააზრება, თუ როგორ გავლენას ახდენს ზმნის დრო მომხმარებლის აღქმაზე, კომპანიებს ეხმარება, უფრო ეფექტურად შექმნან მარკეტინგული გზავნილები. მარკეტერებმა და მიმომხილველებმა უნდა გამოიყენონ აწმყო დრო პროდუქტის მახასიათებლებისა და უპირატესობების აღსაწერად, რათა გაიზარდოს წაკითხული ტექსტის სანდოობა და აქტუალობა. ეს მიდგომა განსაკუთრებით სასარგებლოა ციფრული მარკეტინგის მიმართულებით, რომლის მიზანია მომხმარებლის ყურადღების სწრაფად მოზიდვა და შენარჩუნება.

ექსპერიმენტი და შედეგები

კვლევის დასადასტურებლად მკვლევრებმა ჩაატარეს ექსპერიმენტები, სადაც მონაწილეებს სთხოვეს, შეეფასებინათ სხვადასხვა დროს დაწერილი მიმოხილვების ეფექტურობა. შედეგებმა აჩვენა, რომ აწმყო დროში დაწერილი მიმოხილვები უფრო მეტად ეხმარება მკითხველს და უფრო დამაჯერებელია. გარდა ამისა, კვლევამ გამოავლინა, რომ მიმოხილვის ავტორის გეოგრაფიული მანძილიც მოქმედებდა მის გავლენაზე – უფრო შორეული ადგილებიდან დაწერილი მიმოხილვები ნაკლებად რელევანტურად აღიქმებოდა.

მიმოხილვის წერის პრაქტიკული ასპექტები

როდესაც ვწერთ მიმოხილვებს, სასარგებლოა:

1. გამოვიყენოთ აწმყო დრო პროდუქტის მახასიათებლებისა და გამოცდილების აღწერისას.
2. უზრუნველვყოთ, რომ მიმოხილვის შინაარსი მომხმარებლისთვის აქტუალური და რელევანტური იყოს.
3. გავამახვილოთ ყურადღება მიმდინარე სარგებელსა და პროდუქტიულობაზე, რათა გავაძლიეროთ ნდობა და სანდოობა.

მაგალითად, ფრაზის: „ბლენდერი იყო შესანიშნავი სმუზების დასამზადებლად“ ნაცვლად, უფრო დამაჯერებელი იქნება: „ბლენდერი შესანიშნავ სმუზებს ამზადებს“.

დასკვნა

ონლაინპროდუქტის მიმოხილვებში გამოყენებული დრო მნიშვნელოვან როლს ასრულებს მომხმარებლის აღქმაში. აწმყო დროში დაწერილი მიმოხილვები უფრო ეხმარება მკითხველს და უფრო სანდოა, რაც ზრდის მათ გავლენას პროდუქტის შესყიდვებზე. ამ ცოდნის გამოყენებით, კომპანიებსა და მიმომხილველებს შეუძლიათ, გააუმჯობესონ თავიანთი კომუნიკაციის სტრატეგიების ეფექტურობა.

კითხვები დასაფიქრებლად 

1. როგორ შეუძლიათ კომპანიებს, გამოიყენონ ამ კვლევის მიგნებები საერთო მარკეტინგულ და საკომუნიკაციო სტრატეგიებში, რათა გააუმჯობესონ მომხმარებლის ჩართულობა და გაყიდვები?
2. რა გამოწვევები ან შეზღუდვები შეიძლება არსებობდეს მიმოხილვებსა და მარკეტინგულ გზავნილებში მხოლოდ აწმყო დროის გამოყენებასთან დაკავშირებით  და როგორ შეიძლება ამ პრობლემების გადაჭრა?

წყარო

Ward, L. (2024). “Want to Write a Persuasive Online Product Review? Use the Present Tense.” The Wall Street Journal.