მედიალაბი (დასრულებულია)

ექსპერიმენტული პროექტი სტუდენტებისთვის საინტერესო გარემოს შესაქმნელად და მედიის სფეროში ინოვაციური, ორიგინალური და ახალგაზრდული იდეების განსახორციებლად იყო გამიზნული. პირველადი ჯგუფის ჩამოყალიბების შემდეგ, მედიალაბორატორიამ აქტიურად დაიწყო მუშაობა. პირველი სერიოზული წარმატება მას წილად ხვდა დაარსებიდან ორ კვირაში, როდესაც აშშ–ის საელჩოს მიერ ორგანიზებული Media Hackaton–ის ერთ–ერთი გამარჯვებული გახდა.

Btu Media Lab–ს პროექტმა Media M გრანტი მოიპოვა და უკვე მუშაობს პროექტის ტექნიკური დავალების მომზადებაზე, რაშიც თავად სტუდენტები: თეო ზანგურაშვილი, ბაქარ ფალავანდიშვილი, გეგა თათულიშვილი მონაწილეობენ. მედიალაბორატორია გახდა მსხვილი მედიაორგანიზაციების პარტნიორი, ერთ–ერთი მათგანია “პალიტრა მედია”, სადაც მედიალაბორატორიის რამდენიმე სტუდენტი გადის სტაჟირებას.

მათ შორის არიან ეკატერინე გრიგოლაშვილი (Ambebi.ge-ის სტატიების, რეპორტაჟების და სოციალურ ქსელში ლაივ–ჩართვების ავტორი), ივანე გუჯაბიძე (Lelo.ge–სთვის ამზადებს სტატიებსა და ინტერვიუებს), გიორგი ლოგუა და გეგა თათულიშვილი (მედიაპროდუქტის ტექნიკური უზრუნველყოფა: გადაღება და მონტაჟი “პალიტრა ნიუსის” ბაზაზე).

Btu Media Lab–მა ასევე აქტიური მონაწილეობა მიიღო ambebi.ge–ის განახლებული საიტის შექმნის პროცესში. საიტის ხელმძღვანელობამ მათგან საინტერესო რჩევები მიიღო ambebi.ge-ს მომავალთან დაკავშირებით. მედიალაბორატორიამ დაიწყო ბლიცინტერვიუების სერია ცნობილ ადამიანებთან, სახელწოდებით ~10+1~, რომელიც გახლავთ სპეციალურად სოციალური ქსელისთვის შექმნილი ვიდეოკონტენტი.

პოპულარული ადამიანები სტუდენტების 11 შეკითხვას პასუხობენ. გადაცემის პირველი სტუმარი იყო ცნობილი რეჟისორი ელდარ შენგელაია, რომელთან ჩაწერილმა ბლიცინტერვიუმაც სოციალურ ქსელში დიდი გამოხმაურება გამოიწვია, მას უკვე რამდენიმე ათასი ნახვა აქვს. უკვე მზად არის ამ რუბრიკის კიდევ არაერთი სტუმრის, ლევან ბერძენიშვილის, იმედა კახიანის, გურამ ბაღდოშვილის და სხვების ინტერვიუები. გადაცემის მომზადებაში ჩართულნი არიან პროდიუსერები: ქეთო თოფურიძე, თინა დონაძე, ეკატერინე გრიგოლაშვილი, ანუკა ხურციძე; მენეჯერები: ბაქარ ფალავანდიშვილი; ტექნიკური უზრუნველყოფა: გეგა თათულიშვილი და გიორგი ლოგუა.