BTU-ს მათემატიკის ოლიმპიადის მონაწილეები MIT-ში სრული დაფინანსებით მოხვდნენ
- Categories ახალი ამბები
- Date იანვარი 18, 2022
ბიზნესისა და ტექნოლოგიების უნივერსიტეტისა და საქართველოს მათემატიკოსთა კავშირის ორგანიზებით გამართული მათემატიკის ახალი ოლიმპიადის I ადგილის მფლობელი თეიმურაზ თოლორაია და ფინალური ეტაპის მონაწილე ანა ონოფრიშვილი, MIT (Massachusetts Institute of Technology)-ში სრული დაფინანსებით მოხვდნენ. თეიმურაზი სწავლის გაგრძელებას პროგრამირების მიმართულებით აპირებს, ხოლო ანა – მათემატიკის ფაკულტეტზე ჩაირიცხა.
კონკურსის მონაწილეები ვ. კომაროვის თბილისის ფიზიკა-მათემატიკის N 199 საჯარო სკოლის კურსდამთავრებულები არიან. გარდა ამისა:
- თეიმურაზ თოლორაიას ინფორმატიკის საერთაშორისო ოლიმპიადაში (IOI) ოქროს მედალი აქვს მოპოვებული, ასევე წარმატებით ასპარეზობდა უმსხვილესი საერთაშორისო ტექნოლოგიური კომპანიების შეჯიბრებებზე – Google Code Jam, Facebook Hacker Cup. ამასთან, იგი გახლავთ ჟაუტიკოვის მათემატიკის საერთაშორისო ოლიმპიადაში (IZhO) მაქსიმალური ქულით პირველი ადგილის მფლობელი და სხვა;
- საქართველოს პარლამენტის 100 წლის იუბილეზე ანა ონოფრიშვილს მიენიჭა სახელმწიფო ჯილდო – მედალი. იგი არის ევროპის გოგონათა მათემატიკის ოლიმპიადის (EGMO) საქართველოს ნაკრების ხელმძღვანელი და სარეიტინგო სიაში, “Hall of Fame”, მეოთხე ადგილს იკავებს. მოპოვებული აქვს ევროპის მათემატიკის თასის (EMC) პირველი პრიზი და პირველი ადგილი – ოქროს მედალი და სხვა.
მათემატიკის ოლიმპიადა არის ყოველწლიური პროექტი და მოიცავს რამდენიმე ეტაპს, რომლის ფარგლებშიც ჯილდოვდებიან არამხოლოდ აბიტურიენტები, არამედ – მათი პედაგოგებიც, რაც, თავის მხრივ, აძლიერებს მათემატიკისადმი მძლავ ინტერესს და აბიტურიენტებს აძლევს საშუალებას, განავითარონ მათემატიკური უნარ-ჩვევები.
მათემატიკის ოლიმპიადა წელსაც საქართველოს მათემატიკოსთა კავშირთან პარტნიორობით გაიმართება და მონაწილეობის მიღება წინასწარ რეგისტრირებულ მოსწავლეებს შეეძლებათ.
Previous post
ევროპის მარკეტინგისა და მენეჯმენტის ასოციაციის (EUMMAS) საერთაშორისო კონფერენცია "Global Social and Technological Development and Sustainability''
Next post